په زانوگرءِ زانت ءُ زانگءَ

جي هو ! ما درو ندر په زانوگرءِ زانتءُ زانگءَ باتين.

چيا كه آ واجهءَ وتي زانتءُ زانگءِ كمكين چيزوكي مئي مگزءُ دماگءِ تها جاگه داتءُ گون اي كمكين زانت په ما اكلؤُ پهم ءُ پگري شر كُت ، اگن اي كمكين زانت ما را مبيتين ما را گون هيوانءَ (بزان پسءُ گوكءُ …)هچ پركي نيست ات همئي كمكين زانت مار ار چه آيان دورا كُتگ ،گون همي زانتءُ زانگ آ واجه ما را (اشرف المخلوقات)بزان شرپ دارترين شربوتگينان نامينتگ په همي وجه ءَ كه ما وتا جه بيارين وتي زانت ءُ زرّياتءُ اسلءُ نسبءَ بزانين.بلوچ وتي اسالتءَ بزانتءُ وتي دود ءُ ربيدگءَ شرّيءِ سرا پجاه بيارايت ءُ آييءِ سرا امل بكنت . هنچو اي دگه كوم ءُ پاتّياني ورّا هنچوش كه گجر ، ترك، كردءُ دگه دگه ملكانيمردماني دّولا وتي نبشتانكي تاكان (روچ تاك ،مه تاكءُ گَه تاك )ءُ كتابان ءَ بوان انت ءُ وتي پُچّءُ چولكانءَ وتي اسلءُ نسبءِ ورّا بكن انت ءُ مه ديوانءُ ديوانجاهان په بلوچي زبانءَ هبر بكن انت ءُ گپ بجن انت . پرچا كه بلوچي مئي وتي بيهيءُ ماتي زبان انت كه واجهين شاهر گوشيت:

بلوچي مئي وتي شهدين زبان انت                             بلوچي مئي وتي لبزءُ بيان انت

ما بلوچان ايشيءَ په وت پهرءُ شان مزانين كه مئي چوكءُ زهگان په گجري يا كه اردو زبانءُ اي دگه زبانان ءُ لبزلنكان گپ كن انت ،بلكين ما وتي چوكان ءَ وتي ماتي زبانءِ گپ جنگءَ سوج بدئين ،گون وتي دستان بلوچيءَ‌چكّ ءُ پروش مكنين گرّا اي په ما بلوچان سك ايب انت چه اي كارا په ما مرك شرترانت .هنّي بلوچ مردم بايدين وت بلوچيءَ بسمبال انت ءُ اييءِ اسالتءَ بپهريزانت ءُ اي اجازاتءَ مدينت كه بلوچيءِ سولءُ نهال بگيمُرايت بلكين وتا په آ سولءُ نهالي هزام ءَ تيار بكن انت .

هنيگين بلوچان مه ديوانءُ ديوانجاه بلوچي گپّاني تها دگه زباناني بتلان كارانتءُ كار مرزكن انت زانان چي بلوچانءَ‌وتي زباني (بلوچيءِ) بتل نيست انت كه آيان دگه زباناني بتل بلوچيءِ گپءُ ديوانءَ كارمرز كن انت ؟…بلوچ په وتي زبانءَگون دگه همزباني گپ جنگااينت كه يكوييءَ مه دگه زبانيكُپءِ كنت. وتي منّا آ وتي گپان شيركني مان كنت آ مرد يان شيرءَ زال نزانت كه پهك ءَ‌بلوچي بي تامءِ بيت . پيشءَ بلوچي گون پچءُ چولكانءُ بلوچي گپ جنگ پجاه آرگ بيتگ ، بلي هنّي هرچ كومءُ ملتي اي بلوچي پچءُ چولك پر انت.

مه اوگانستانءَ اوگانان، مه پاكستانءَ پنجاپيءُ اردوزبانان، مه ايرانءَ گجرءُ اوگانان،مه هليج ءُ عربي- اپريكي- امريكيءُ يوروپءَ ملكان كه هچ پجاه آرگ نبيت تان بلوچي زبانءَ يك گپي مج انت ،هنيگين دور بلوچي پهكا بي گواه ءُ تباه بان انت بلوچي ءِ سولءُ نهالءَ تنيگءَ هچ كسءُ هچ هكومتي آپ نداتگءُ نه پهريزتگ اگن آيان دل سوچك بيتين اتنت بلوچي زبانءُ دودءُ ربيدگ چوش بي گواه نه ات ،هني اي گرانين ءُ مزنين كار په مئي ءُ شمئي زمهءُ‌ اگدهءِ انت اي په ما ءُ شما ءُ بلوچي زباني دوزواه ءُ هزمت كنوكان واجب انتءُ ايشيءَ په وت پرز بزانينءُ بلوچيءَ به پهريزينين ءُ‌به سمبالين ،په ماتي زبانءَ مجلسءُ ديوان بگرين ءُ گپ ءُ‌تران بكنين بلوچيءِ‌رسمءُ دودءَ زندگ بدارين ءُ‌چه واجه هدايءَ بلوتّين كه بلوچيءِ‌اُمرءَ دراج ءُ بلوچيءِ سولءَ سبزءُ‌ آبادءُ بلوچيءِ ملكءُ دمگءُ بلوچءِ‌دّيههءَ گون بلوچءُ بلوچ زبانان آبادتر ءُ آيي دژمنان چكّ ءُ پروش بكنت.

 هنچو بات

تاريخ ءُ آنتی تاريخ

هوشنگ سربندی براهويی ( اُلُـس )

مروچگين گِندءُ پَـٹءُ پوْل تاريخءِ بارَوا، بازينی چه پيسرين تاريخی پَـٹءُ پوْلانءَ که مردمءِ سرگوَست نه اَنت، نَمَنـّيت. چياکه پيسرين تاريخ نويسانءِ سماءُ چَمـّان په شاهان، اميرانءُ آوانی جنگان سَـکّ اِتـنتءُ راجءُ ملّت آوانی تاريخءِ توکا کم رنگ گندگ بوتگ. بازين تاريخی کتابءِ توکا مردمءِ کارپد، واک، واهگ، رنج، درپدریءُ بزّگی شموشگ بوتگ.  درور اگان يک ميليون تاريخی کتابیءَ بچارے، صد چه آوان مردمءِ زرمبشءُ واهگانا په شـّری تران نه کتگ.

گيشترين گوستگين تاريخ نويسان وتی کتابانا چه اميران ءُ وزيرانءِ زبانان دربارءِ توکا نشتگ اَنت ءُ نوشتگ آنت. ياکه اگاں اَروشانی توکا شاهانی همراه بوتگ اَنت، وتی ملکءُ شاهءُ لشکرءِ بهادرّیانا وشنويس کُتگ ءُ اے دگه ملکانءِ مردمانا اير جَـتـََگ انت. هر بلاهی هم که راهسرين مردمءِ سرا بياتکين اَت چه تاريخ نويسانءِ چمان انديم اَت. درور: تاريخ طبری، بلاذری، ابن اثير، انگريزءِ اُروشءِ تاريخ، قاجار ءُ پهلویءِ زورانسريانءِ تاريخ، ايرانءُ پاکستانءِ جوڑ بَـيـَگءِ تاريخ ءُ بازينی دگه چه چوشين تاريخان.

هژدهمی کرن تا بيستمی کَرنءِ گيشترين تاريخی فاکت ءُ نوشتانکان ماں هِند، بلوچستان، کابلستان، هُراسان، پارسءُ گيشترين عربیءُ افريکی ملکان، انگريزءُ جرمن ءُ فرنسءِ جنرالانی دستا نويسگ بوتگ. الّم زانگ بيت که يک ڈنـّی جنرالی اے ملکانءِ توکا چی لوٹِـتـَگ ءُ آيیءِ تاريخی نوشتانکءِ مکسدءُ آسر چی بوتگ. بچاراِت( جنرل دائر، سرپرسی سايکس، لورنس ....)ءِ نوشتانکانا.

مروچین چمشانکان تاريخءِ سرا ءُ کارمرزی چه تاريخ تغيير کُـتگ، بزان تاريخءِ دروازگ چه مردمءِ ردوم، زانت، هنرءُ واهگان يا که چه مردمءِ نزوريانءِ سَوَبان پاچ کنگءُ گِندگ بيت. چوش نه اِنت هر چيز که طبری يا انگريزان نوشتگ اَنت ءُ زورانسرين حکومتان په وتی سياستانی ديما بَرَگ ماں يونيورسيتیءُ اسکولان هُج کُتگءُ کن اَنت، ماهم بـِمَـنّ اِن ءُ کارمرزش بکن اِن!. شرتر ايشنت که بچارِن پهلویءُ محمد علی جناحءُ انگريز يا نادرءُ مغولءِ مکسدان چی بوتگ ءُِ چه دگه نيمگی راجءُ مِلّـتانی واهگان چی اَنت؟  مروچی ما زانن که  اے درستين درآمدين تاريخانی آسر مے راجءِ پَشت کَپگی، َبّزگی، ڈيهـ ، جيلءُ زندان ءُ بازين کُـشتءُ کوْشےءَ سَـوَب بوتگءُ هنگت هم هست اِنت.

اگان تاريخ چه مهارسِستگين، آنتی راج ءُ ناراستين هکومتانءِ زبانءُ نوشتانکان پؤل بـبـيت، راجءِ هويت، راجءِ زانتکارانءُ شهيدان، راجءِ واهگانءُ هکّين جيڑهان، راجءِ ردوْمءُ ارمانان ءُ راجءِ آيوکين زهگانءِ زند نزورءُ گارءُ زيان بـيـت.

سر جم گوشگ لوٹيت که چوشين ناراستين تاريخانءُ گوستگين لهتے تاريخ نويسیءِ دروشُم، مِلّـتانی جانءُ مال، دوْدءُ ربيدگ، علمءُ زانتءِ مسترين دشمن انت.

پيش چه يونايتد نيشِنءِ جوڑ بَـيَـگا بازين ملکےکه په زورانسری بهرءُ توْر ءُ هولّ بوتگ اَت گون هما شکلءُ ڈولءَ ماں سازمان ملل متحد(يوـ اِن) رجيسترد ءُ ثبت بوت. ما زانِن که آ درگتان يو ـ اِن  نوْک جوڑ بوتگ اَت ءُ آيیءَ اِينکسين واکی نبوتگ که هول بوتگين ملکانا بگيـپتءُ په آوانی هَکداران واپس بکنت. بلے زانِن که هيومن رايتءِ قانونءُ منشورءِ توکا درستين راجانی هکّـان مَـنـّـَگ بوتگ. پميشکا هما راجءُ مِلَـتان که هولّ بوتگ اَنتءُ ظلمءِ چيرا اَنت ءُ وتی آزاتیءَ واپس گِرَگ لوٹـنت، زرورت گِندگ بيت که يوـ اِنءِ هيومن رايتءِ منشورءَ واک بـِدَيَـنتءُ گون آيیءَ تپاک بـِبَـنت. هَنچوش کم چه کم هر روچ وتی واهگانا دنياءِ چارين کوْنڈان شنگ بکننت. گون اے اَميتءَ که بانداتگين روچان ميدياءِ سامان بزان  روتاک، رديو، ٹی ویءُ اينترنت چه ميلٹریءُ جنگ سالارانی دستا گِرَگ بـبـيت ءُ په مردمءِ ردومءُ آوانی هکّين واهگان کارمرز بـبـيت.

راستين تاريخءِ درگيجگءُ نويسگ اگان چه مردمءِ واهگءُ کارپدان گِندگ بِـبـيت، انسانءِ ردوْمءِ گامان هم تيْزتر بيت. هنچوشکه بُرزا گوشگ بوت انسانءِ تاريخ دو مزنين بهرءِ توکا ماں گِـرءُ هِـلّ بوتگ:

 1ـ سنتراليسم لوٹانءُ ديکتاتوران گون کارمرزی چه پوج، ميديا ءُ ملّـتانی راجی مَــّڈيان کوشش کُتگءُ کن اَنت که تاريخا وتی نيمگا بکَـش انت ءُ وتی فکر، ناراهين رهبند ءُ نامءُ توارا سرگوستانی سرا اير بِکن اَنت.اشان درستين استمانی زرمبشءُ راجءِ واهگءُ دسترنجانا تهارين پردگانءِ پُشتا انديم کننت، ميليونان انسانا په کوْش داتگءُ دَيَنت، بازين وتـَنی ويران کتگءُ کن اَنت. بلے بغير چه وتی مکسدان دگه هِـچ چيزا نگِنـدنت، نگوشنت ءُ نه نويـسـنت. درور: گوستگين امپراتوریءُ مذهبی عقيده يانءِ اُروشان ءُ نوکين لهتے مَگرِبی( * ) جهانوارين هکومتانءِ سياستان ءُ آوانی نپَرءُ چَپَران گون شويونيزمی شکلان مان لهتے ميان استمانیءُ آسيايی مُلکان.  درانگازترين درور: ( جمهوری اسلامی نظامی ايران ءُ جمهوری اسلامی نظامی پاکستان ).

( * ) ـ  تاں وهدے که لهتے مَـگربی مُلکانءِ سياست، شويونيسمی هکومتانءِ پُـشتءُ داروک اِنت، طبيعی اِنت که آوان هولّ بوتگين راجءُ ملّتانءِ دشمن انت. ( اميت اِنت که مگربی هکومتان اے وتی بَدين سياستا بدل بکننت ءُ هکيکتا بـگند اَنت. هنچوش که آزاتیءُ دموکراسیءَ په وتی مُلکان لوٹنت، اے دگه بنديگين مُلکانی بزّگيانا هم گون انساندوستیءُ برابرین مارشتی بگندنت).

2ـ انسانءِ هر کَـلّـَگءُ کالونی ءُ هر جامعهءُ راجــی چه انسانءِ وتی واهگءُ احتياجءُ دسترنجان جوڑ بوتگ.

راجءِ هر پيداوریءُ نشانگی چه بازين کارءُ زهمتی جوڑ بوتگ. لهتے دسترنجان بازين کَرنے وهد بُرتگ که نوکين نسلءِ دستا رَسِتگ چوشکه آوانی وتن، زبان، کلچر، ميوزيک. باز گرانءُ سَـکّ اِنت که اے دسترنجان چه يک راجءُ ملّتے دستا گِرَگ بـِبيتءُ چه تاريخءِ چم انديم بمانيتءُ تاريخ گوشگ مبیت.

نوکين تاريخءِ دروشم ءُ فاکتور انسانءِ آزاتی، زانت، واهگ ءُ ردوم اِنت. اگان اے چيزان تاريخءِ بُن رِد مَـبَنـت ءُ  اُروش ءُ کُشتءُ کوشا تاريخ بگوشِن، بزان انسان چه راستیءُ دمکراسی باز دوراِنت.

اگان انسانءِ ساينس، ردوم، آزاتی، انساندوستیءُ برابری تاريخ گوشگ بيت، مَنی هيالا هکومتانی که اے چيزانءِ سرا اروش کنـَنت آنتی تاريخ اَنت.

همبلان هژار!

 بھارگاھے مسوم ات۔  صباھے سرات ۔ گوات شیک شیک کشگا ات۔ میتگ انجوشکہ جنتے پیما  وش ات ۔ دروہ جاہ سرسبزو پل و گلابانی وشین بو ات۔ بلوچ چہ گلا بال ات انت۔ ھر نیمگا ھینزکانے چلوک چلوک و پس و شنکانی، گینژ و گانژے توارات۔ ملک ناز لوگے کنڈیا نشتگ ات و تیموشی نگن پچگ ات مھربی بی و میرم ھاتون ماتے کشا نشتگ گد دوچگا ات انت ۔ لوگے تھا کندگ وکچیسکگ ات او آیئے  شش سالگین جنکوک، بانوک شاری گون وتی نازروکین دستان، شیرے ھینزکا چلوکینگ ات ۔نوھان پسان  و شنکانی کاہ و کدیمے دیگے چنولانچا ات۔  کسانوکین دلپل جان ڈن چہ لوگا شئیرے گون وتی بارگین گٹا دپگال کنک ات:

 ھور انت و بھار انت

گوڑانڈے دمب دار انت

نوھان جان ھرا سوار انت

شھمیرماں دمبا روان انت

شیر شیلانچ کچوا مان انت

میتگے شپانک وتا پہ کوھے روگا آمادگ کنگاات۔  سجیئن میتگے ھورد چہ مزن گون وتی  کارو چلوپگان گر وھل ات انت۔

لوگے کماش واجہ شھمیر کمے گوشے دلگران و پریشان ھال ات۔

واجه کماشے برات چنت روچا پیش مان سربازء یک میتگیا، ایرانی اسلامی رجیمے سلاحبندین و هونوارین پوجیانی پلیتین تیرانی آماچ بیتگ.بلے ا گون مان میاتکیا اے درد و غمان  مان نه ارت  و گون کریچکین پیشانیگ و پروشتگین دلے، وتا پہ  کوھے روگ وکاھے چنگے بندوبستا ساجو کنگاات

شھمیر چہ لوگا در بیت و ملک نازی توار جت، نازوک او نازوک مں رپتاں کوھا ۔ ملک اشتاپ اشتاپا چہ لوگا دراتک و چاردانگ تیموشی نگن وکسانین ھینزکے شیرگون کاشیگے مان اسپیتین دزمالے پتاات و واجکارے سرتنگا مان کت وگوشتی برواللہ تئی پشت و پناہ بات۔ شھمیرسرتنگ بڈا کت و دیم پہ کوھا رھادگ گپت۔ گپڑے راھے روگا چہ رند،کوھا سر بوت۔ داسی چہ گردنا کش ات و کاھے چنگا گلایش بیت۔ سارتین گوات تیزیا کشگ ات اوھور کموک کموک شمورگاات۔ درچک و دارانی وشین بوہ ات ۔درچک ودارانی پل ر بر و تاکان گون سبکین گواتے کشگا گوشے پہ کھیبیا لڈگ ات انت۔ شھمیر داس چہ گردنا کش ات و کاھے چنگا گلایش بوت گون شھمیرے سرینے جھل بیگا  گواتا سرتنگ پشتا برت شھمیرا سرتنگ لٹینت دوارہ کاھے چنگا لگت ،دومیگین رندا ھن سرتنگ لیٹ ات سیمی رند ھن ھنچو، چارمی رندا شھمیر گواتے سرا زھر گپت و سرتنگی گون داسا در درکت وگون ھالیگین دستے دیم پہ لوگا رھادگ گپت۔

شھمیر لوگا آتک و سر بوت ھرا کہ وتی واجہ دیست سرگا لگت۔

شھمیرا دراینت او ھر، وتی ھما چوش پلانا بور۔ ملک ناز شھمیرے لوگ بانوک چہ لوگا در اتک و تواری پر دات۔ نوھانے پت ترا چون انت۔ تئے کاہ کجنت۔ واجکارا گون تھروزیا دراینت، نازوک، من سرتنگا کوھا دردرکت و دور دات و دست ھالیگھا آتکون۔ پہ اے ھاترا کہ گوات منا موہ ندات کہ من کاھانا بچنان۔

شهمیرا نان و چاهے وارت و دمانیا رند دیم په بلوچانی دیوانجاها روان بیت.

مان دیوان جاها وڑ وڑین گپ و تران بیئگاات.کندگ و کچیسکگ ات. لهتے بلوچانی بزگی ے باروا گپ و تران ات انت و لهتے دگه دگنیای گپ و ترانءات انت.

شهمیری دیم په دیما یک وش کد و بالادین واجهے وتی گپا چوش بنگیج کت :

واجهان براتان همبلان!

 کے انت که بلوچانی بزگی واریا نزانت؟

کئے انت که آ بلوچستانے مزلومی هالا سرپد نه انت؟

اے زلم کنوک کئے انت؟

ما بلوچ پرچے چوش بزگین؟

ما بلوچ چون بکننین که اے زلم زورانسریانی دیم دارگ ببیت

هوشکین هبر کارے شر نکنت عمل هن لوٹیت.

عمل کنوک کئی انت ؟ یکی،دو یا که سجئین کوم....؟

واجهان منی هیالا بلوچستانے بزگی واریء مسترین و مهمترین  سبب اش انت که آ مان سه(3) ملکا بهر کنگ بوتگ و سه(3) بلاهین هژدیای دپ  بلوچانی بڈا سک انت. وهدے که بلاه یکیا دپ جنت کوکار و چیتک جنگ مزلومین انسانے اولی کار انت. بلوچ باید انت که کوکار بکنت ک آ دگه مردم سهیگ ببنت که اے واجها ویلے گپتگ یان که هژدها ء دپ جنگاانت. بلئے اے کمبهتین هژدیاها هنچین تلسمے یاد گپتگ که په چیتک و کوکارا هن نئلیت چتک جنوک و کوکار کنوکے دپا هنچوش بند کتگ که دگه برے  آ نه آئی هپتپشت هچبر نژگے هن جت مکنت؟!.بلوچ بدواهی اولی مکسد و مراد اش انت که بلوچ کوما وت مان وت بیمڑینیت  و اودان کشت و کوش و تباهی بیارایت.

دومیگین مسترین و مهمترین سبب مئی بلوچانی ناتپاکی انت  

بلئے اپسوز که گپ جنوک سک باز انت ،عمل کنوک سک کم...

دگه واجهی دراینت ، جی هو،بلوچ دژمنین واکدارانی مدیمی ٹگی و پلینڈی همے بوتگ که آهانا گون وت مان وت بمیڑینیت و بلوچ نسل ء نیست و نابود (بیگواه) بکننت.

دلپل جانا گون وتی وشین کد و بالادا دراینت که:

واجهان براتان،ما اگن کمے تاریحے سرا چمان شانک بدئین گندگ  بیت که آزمانگا مزنین ایرانے گپ بوتگ.ترکیه عثمانی هم مزنین بهرے چه آسیا مرکزی بوتگ دگنیا چوش پیش نروت. ترکیه آتک په یک گونڈین ملکے بدل بوت ایران هن هنچوش گونڈ بوت. دیمترا هن هنچین وهد و زمانگے کئیت که ایران پدا پروشیت، ترکیه، پاکستان هن پروشنت چوش که گوستگین شورویء...

منی اے گپے جنگے مکسد اش انت که تپاکی،مچی و هورکاری ء وهد انت وتی ہڈے کپگ و بد و بیراه گوشگا انگار بکن ات دگه بس انت،

 بس انت هما سئین هژدیها که سالانی سال انت دپ اش تئے بڈا سک کتگ.

 من اچ وتی زردے جهلانکیان چه شما واجهین زانوگران دزبندی کنان که دوستی ، هورکارئی و هنچوش تپاکئے دستا گون یک و دگرا دراج کن ات.

همی درگتا واجه شهمیرا وتی تپاکی شئیرء دپ گال کنگا لگت:

او بلوچ او بلوچ

همدل و همیارین بلوچ

بے وس و لاچارین بلوچ

وپتگ و وابین بلوچ

گجر و ملا حمینی ے هدوک

اے مکر و هیلهانا بسوچ

بیڑگیری و کینگا بسوچ

هژار به بو و شر بچار

هژار به بو و شر بچار

کتگ دژمنا تئی عهد و کرار

که راجا بکنت تئی بے نام و توار

او بلوچ او بلوچ

همدل و همیارین بلوچ

ناتپاکی و برات کشیء به سوچ

چگولی و پلینڈیء به سوچ

دروگ، بٹاک و هیرگا به سوچ

که دیر نه انت انگت په ترا

نون سار بکن په یک برا

نون سار بکن په یک برا

دستا تپاکی ء  گون کوما شهار

دستا تپاکی ء  گون کوما شهار

 و رندا وتی گپی  چوش بنگیج کت:

همبلان هژار! همبلان هژار! همبلان هژار  مان اے موجودین هالتانی تها په ما بلوچ راجے درستین ٹکان پرز انت که په راج و کومئے وشهالی و ائے ے حقانی پد جنگے هاترا، مچی،هورکاری و تپاکی  بئیرکا گون دوئین دستان چست بکنین ودور چه هر وڑین تنگ نظریء اے کسانین اڑ و جنجالانا مان یک ژاپنی تیترونین گدے بپیچ ات و یک کرا ایر کن ات و ایرانے اسلامی جمهوری رجیمے هلاپا هور گون یک و دگرا( بلوچان) و انچوش گون اے دگه  روشین هیالین و ترکی پسندین کومی راجان وتی جد و جهدے کاروانا مهکمتر بکن ات .                                                                    

من چه وتی زردے جهلانکیان چه شما بلوچ راجے درستین ٹکان هاس یوروپ ء بلوچان دزبندی کناں که اے تھارمسگین دودوربیدگی پکرو ھیال که هما پلیندی ، تا من نکشتگ هلار نه انت.... پردگا بسندات۔ مه هلیت کہ ایرانے راج دژمنین  واکداران گون ھر نام و مسلکے شمئے دیمروے رکاوٹ ببنت و اچ وانوکان و بلوچی تنظیم و پارٹیان دزبندی کنان کہ آ پہ بلوج کومے وشهالی و آباتی حقانی پد جنگء هاترا،کومے متحد و عملی جد و جھدے آسر رسینگے هاترا هوری و مچی تپاکی و هورکاری ء بئیرکا گون دوئین دستان جست بکن ات.

چیا که بلوچ راج هما وهدا په وتی ملی لوٹان رسیت که آ یک و دگرا برداشت و تهمل بکنت آ مچ ببیت تپاک ببیت و هور کار کنگا هیل بکنت.

او بلوچستان تئ دوری منء بے واک کننت

او بلوچستان تئ دوری منء بے واک کننت

بے اجامی زھیر بندانت سینگا چاک چاک کننت

سرومگین کوہ و ھساران نقشنت یک یک مئے دلا

پہ ھمے یادان زرانان روچ و شپ من چہ گلا

ا‎‎ۓ تئ عشقنت منا بلبلی گویاک کننت

پراھگین آزمانا کہ جڑ بندانت تئ

ڈھل و چاپ و زیملان گون کہ سرا گرندانت تئ

گوارگان مھرء کتابا مئے دلا تاک تاک کننت

او منی دوستان زرۓ چولانی ما باھوٹ بئین

شے مریدۓ عشقء بیارین پہ وطن ما لوٹ بئین

پہ وتی حقء یلان کمبری بے باک کننت

گشتگان دراھین جھانا ھرچ تک و ھرچ شما

من ندیست دگنیاھا تئ رنگ و تئ دروشما

بندگء زردء ھیالان بارین کدی واناک کننت

بے اجامی زھیر بندنت سینگا چاک چاک کننت